My Lovely Man

ចេញពីធ្វើការ នាងកែប្រែគំនិតសំរេចចិត្តមិនធ្វើដូចសព្វដងអញ្ចឹង ធ្វើបាយអោយគេហូប បន្ទាប់មកនាងអង្គុយទល់មុខគេមើលទូរទស្សន៍ជាមួយគ្នាដោយមិននិយាយអ្វីទាំងអស់។រៀបការអស់រយៈពេល៦ឆ្នាំហើយការរស់នៅប្រៀបដូចជា​ ទំរង់បែបបទមួយ ការនិយាយស្តីរបស់គេប្រៀបដូចជាមនុស្សធុញទ្រាន់ចចំពោះគ្នា។

គេ “មកវិញហើយហ្អេស?” នាង​ “អាចញុំបាយបានហើយឬនៅ?”  គេ “អឺ” ទីបំផុតមានថ្ញៃមួយនាងក៏សួរទៅគេថា “បងស្រលាញ់អូនទេ?” គេស្រែកគំហកដាក់នាងថា​”តើអូនឆ្គួតឡប់អីទៀតហើយ?" នៅក្នុងចិត្តរបស់នាងអស់សង្ឃឹមយ៉ាងខ្លាំង ការស្រលាញ់គ្នាដែលមានពីមុនមកពេលនេះត្រូវទឹកស្អាត​ លាងជំរៈអស់រលីង។

នាងបង្វែរកង់សំដៅទៅទិសមួយ ទៅទីណាក៏នាងមិនច្បាស់ដែរ នៅក្នុងចិត្តរបស់នាងនឹកឃើញឧបាយកលដ៏អាក្រក់មួយ នាងចង់សាកចិត្តរបស់គេ តើគេនៅស្រលាញ់នាងទៀតទេ។នាងបិទទូរស័ព្ទដៃ ជិះទៅជិះមកដោយគ្មានទិសដៅពិតប្រាកដ។

នាងញុំមីឆាអស់មួយចាន ក្រោយពីមើល​ ការបង្ហាញម៉ូដសំលៀកបំពាក់នៅតាមផ្លូវចប់ហើយ តែនៅមិនទាន់យប់នៅឡើយ នាងក៏ដើរបន្តទៀត។ នាងលួចគិតក្នុងចិត្តថា “ពេលនេះគេប្រាកដជាអន្ទះសារហើយមែនទេ?​ ពេលនេះគួរតែដឹងពីសារៈសំខាន់ខ្ញុំហើយមែនទេ?” នាងពេបមាត់ញញឹមម្នាក់ងង។​ ឆ្លងកាត់ហាងកាត់សក់មួយ នាងគិតថាគួរតែដល់ពេលដូរម៉ូតសក់ហើយដើម្បីអោយគេភ្ញាក់ផ្អើលបន្តិច។ នាងដាក់កង់អែបនៅម្ខាង បន្ទាប់មកដើរចូលទៅក្នុងហាងធ្វើសក់។

កក់សក់ កាត់សក់ មូរសក់ ជ្រើសរើសម៉ូដ….. មិននឹកស្មានថាដូរម៉ូដសក់ថ្មីត្រូវវេទនាយ៉ាងនេះសោះ នាងបណ្តោយសក់របស់នាងអោយជាងធ្វើតាមចិត្ត ខ្លួននាងផ្ទាល់ក៏បានគេងលក់ដោយមិនដឹងខ្លួន។ មិនដឹងជាកន្លងផុតទៅយូរប៉ុណ្ណា ជាងធ្វើសក់ក៏បាននិយាយឡើង “រួចហើយ” នាងភ្ញាក់សំលឹងមើលខ្លួនងងនៅក្នុងកញ្ចក់ វា! ពិតជាធ្វើអោយនាងភ្លឺភ្នែកមែន។​ បង់លុយរួចនាងបើកទូរស័ព្ទមើលម៉ោង នៅក្នុងចិត្តស្រែកមួយម៉ាត់យ៉ាងខ្លាំង “វីវរហើយ!” ពាក់កណ្តាលយប់ទៅហើយ​ ការលេងសើចនេះដូចជាធំពេកហើយ។

នាងប្រញាប់ប្រញាល់ធាក់កង់ត្រលប់ទៅផ្ទះវិញ។ មកដល់ក្រោមផ្ទះ នាងមើលឡើងទៅលើផ្ទះ ឃើញនៅមានពន្លឺភ្លើងភ្លឺនៅឡើយ។ នៅក្នុងចិត្តរបស់នាងស្រាប់តែមានអារម្មណ៍កក់ក្តៅឡើងទឹកភ្នែករលីងរលោង។

បើកទ្វារផ្ទះភ្លាមនៅក្នុងផ្ទះស្ញាត់ជ្រាប ដូចជាលឺសំលេងស្រមុកតិចៗ ។ គេគេងនៅលើសាឡុង មាត់ចំហរពាក់កណ្តាល គេងលក់យ៉ាងស្រួល។ នាងឈរសំកុកនៅទីនោះ បេះដូងត្រជាក់អស់ពាក់កណ្តាល នាងគិតថាស្នេហានេះពិតជាដើរដល់ទីបញ្ចប់ហើយ។

ព្រឹកថ្ងៃទី២ ភ្នែកនាងក្រហម នាងធ្វើអាហារពេលព្រឹកនៅផ្ទះបាយ នាងបោះចានចង្កឹះអោយ លឺសូរសំលេង    ភីងផាំង។  គេក្រោកចេញពីសាឡុងយកដៃញីភ្នែកហើយសួរ “ហេតុអីក៏យប់មិញអូនមិនបើកទូរស័ព្ទដៃ?” នាងសំយុងភ្នែកចុះមិននិយាយសី្ត។ សំលេងទូរស័ព្ទបន្លឺឡើង នាងរត់ទៅទទួលនោះគឺជាសំលេងស្រែកខ្លាំងៗរបស់មិត្តភក្តិនាង “តើយប់មិញងងទៅទីណា?”  ធ្វើបាបពួកយើងមិនបានដេកស្រួលពេញមួយយប់” នាងកំពុងតែឆ្ងល់ គេអេះក្បាលនិយាយ “យប់មិញបងរកអូនមិនឃើញក៏ទូរស័ព្ទទៅមិត្តភកិ្តទាំងអស់របស់អូន” នាងសំលឹងមើលគេ បេះដូងដ៏ត្រជាក់ក៏ត្រលបើទៅជាមាន   កំដៅវិញបន្តិច។

គេជួយនាងរៀបចំអាហារពេលព្រឹក ពេលដើរចេញពីផ្ទះបាយទៅតុអាហារ គេស្រាប់តែស្រែក “អូយ” មួយម៉ាត់។ នាងឃើញខោរបស់គេអស់មួយផ្ទាំងធំ។ នាងសួរទាំងភ្ញាក់ផ្អើល​ “ហេតុអីបានទៅជាអញ្ចឹង?” គេលើកបាយដាក់លើតុ  បណ្តើរនិយាយបណ្តើរថា “យប់មិញពេលចេញទៅរកអូន​ ដើរលឿនពេក មិនប្រយ័ត្នក៏ជំពប់ជើងដួរទៅលើដី” កែវភ្នែករបស់នាងសំលឹងមើលគេជាប់ នៅក្នុងចិត្តដូចជាឈឺចាប់ជំនួសគេបន្តិច។ នាងសួរតិចៗ “ចុះក្រោយមក?” គេឆ្លើយ “ក្រោយមកបងរកឃើញកង់របស់ឈប់នៅមុខហាងធ្វើសក់មួយ ហើយអូនកំពុងតែធ្វើសក់នៅក្នុងហាងនោះ អញ្ចឹងបងក៏ត្រលប់ទៅវិញទៅ”  នៅស្ងៀមអស់មួយសន្ទុះ នាងសួរបន្ត​ “ហេតុអីក៏បងមិនចូលទៅ” គេសួរទាំងឆោត “តើបងចូលទៅធ្វើអី? បើបងមិនចេះធ្វើសក់ផង” នាងចង្អុលទៅថ្ងាសរបស់គេខ្លាំងនិយាយថា “បងងងនេះ” ។

គេញុំបាយបណ្តើរសួរបណ្តើរ “យប់មិញទូរស័ព្ទដៃរបស់អូនអស់ថ្មមែនទេ?” មុខរបស់នាងឡើងក្រហម តែមិន   និយាយ។  គេនិយាយ “ថ្ងៃក្រោយ បើមិនត្រលប់មកផ្ទះវិញចាំបាច់ត្រូវទូរស័ព្ទអោយបងផង” នាងងក់ក្បាល។

គេស្លៀកពាក់រួចរាល់ចេញទៅធ្វើការ។ នាងផ្អែកនៅមាត់ទ្វារ ផ្អៀងក្បាលសួរ “ម៉ូដសក់របស់អូនស្អាតទេ?” គេហាក់ដូចទើបតែភ្ញាក់ ពិនិត្យមើលបន្តិចហើយនិយាយ “ស្អាត”​ ហើយបន្ថែមមួយម៉ាត់ថា “អូនធ្វើសក់ម៉ូដអីក៏ស្អាតដែរ” ។ នាងពេបមាត់ទាំងមិនពេញចិត្ត។ គេក្តិចថ្ពាល់របស់នាងញញឹម គេចេញទៅក្រៅបណ្តើរ ហើយនិយាយ            បណ្តើរថា “ពេលយប់ឆាប់ត្រលប់មកផ្ទះវិញបន្តិច ហើយកុំភ្លេចសាកថ្មទូរស័ព្ទដែអោយពេញផង” មើលឃើញគេបាត់ស្រមោលនៅជណ្តើរ នៅក្នុងចិត្តនាងផ្អែមល្អែមយ៉ាងខ្លាំង។

មែនហើយការរស់នៅរបស់ប្តីប្រពន្ធ គឺជាទំរង់បែបនេះ។ មានខ្សែរភ្នែកដែលសំលឹងគ្នាធម្មតាៗ និងការនិយាយគ្នាបែបធុញទ្រាន់ ប៉ុន្តែ នៅក្នុងនោះបែរជាមានបង្កប់នូវស្នេហាមួយដ៏ផ្អែមល្ហែម និង ការស្រលាញ់មួយដែលគ្មានអ្វីអាចនឹងប្រដូចបាន ៕